KONSTITUTSIYa HAFTALIGI
Jizzax shahridagi 10-umumta’lim maktabida “Konstitutsiya – baxtimiz qomusi” mavzuida adabiy-badiiy kecha bo‘lib o‘tdi.
– Bugun maktabimiz o‘g‘il-qizlarining huquqiy bilimlari yana bir bor sinovdan o‘tdi. Ularning hozirjavobliklari – qonunlarimizni puxta o‘zlashtirayotganlari, o‘z o‘rnida ulardan hayotda to‘g‘ri foydalana olishlarining guvohi bo‘ldik, – deydi maktab direktori To‘lqin Yunusov.
Shuningdek, tadbirda yoshlar o‘rtasida Konstitutsiyadan o‘rin olgan moddalar aks etgan “Eng yaxshi devoriy gazeta” ko‘rik-tanlovi tashkillashtirildi. Har bir sinf o‘quvchilari o‘zlarining burch va erkinliklari kafolatlangan bob va moddalarni devoriy gazetada aks ettirdi.
Shoira XOLMATOVA,
Jizzax shahridagi 10-umumta’lim maktabi o‘qituvchisi
Poytaxtimizning Shayxontohur tumanidagi 484-maktabgacha ta’lim muassasasida O‘zbekiston Respublikasi Konstitutsiyasining 22 yilligiga bag‘ishlangan tadbir o‘tkazildi.
– Muassasamizda eng avvalo bolalarning salomatligiga, ruhiy tetikligiga katta e’tibor qaratiladi. Ularning salomatligi doim nazoratda, – deydi MTM mudirasi Nigora Alixanova. – Mazkur maskanda 400 nafarga yaqin o‘g‘il-qizga ta’lim-tarbiya berilmoqda. Tajribali tarbiyachilar kichkintoylar bilan matematika, rangtasvir, musiqa, jismoniy tarbiya va boshqa fanlar bo‘yicha mashg‘ulotlar olib boradilar. Logoped, psixolog, musiqa o‘qituvchilari mashg‘ulotlarni “Qadam-baqadam” dasturi asosida o‘tadi. Bolalarni maktabga tayyorlash bo‘yicha har bir pedagog aniq reja asosida ish olib boradi. Shuningdek, kichkintoylarning boshlang‘ich huquqiy savodxonligini oshirish borasida ham samarali ishlar yo‘lga qo‘yilgan.
M.XO‘JAMURODOVA
Toshkent qurilish va milliy hunarmandchilik kasb-hunar kollejida Konstitutsiya haftaligi o‘tkazildi.
Mazkur haftalikning ilk kunlarida o‘quvchilar bilan xalqaro OITSga qarshi kurash kuni munosabati bilan 17-oilaviy poliklinika shifokor-ginekologi M.Qayumova suhbat o‘tkazdi. Shuningdek, mazkur tadbir doirasida kollej o‘quvchilari o‘rtasida “Siz qonunni bilasizmi?” mavzusida bellashuv tashkil etildi.
Haftalik davomida “Konstitutsiya – baxtimiz poydevori” ko‘rik-tanlovida o‘quvchilar o‘zlarining turli devoriy gazeta, insho, buklet, referat, mustaqil ish va qo‘l mehnati asosida tayyorlangan ishlari bilan qatnashishdi.
D.ESHONXONOVA
Yunusobod tuman Tibbiyot birlashmasiga qarashli 56-oilaviy poliklinika ma’naviyat zalida “Konstitutsiya – baxtimiz poydevori” mavzusida tadbir o‘tkazildi.
Konstitutsiyamizning 22-yilligi munosabati bilan Yunusobod tuman hokimligi, tuman Xotin-qizlar qo‘mitasi ma’naviyat-targ‘ibot markazi, tuman “Kamolot” YOIH va Toshkent Davlat yuridik universiteti hamkorligida o‘tkazilgan ushbu tadbirda Qomusimizning tashkil topishi, qonunchiligimiz, unga o‘zgartish va qo‘shimchalarning kiritilishi, saylovga tayyorgarlik, saylash va saylanish huquqi hamda munosib nomzodlarga ovoz berish kabi masalalar yuzasidan ma’ruzalar o‘qilib, tushuntirish ishlari amalga oshirildi.
M.AHMEDOVA
