ИЖТИМОИЙ ҲАМКОРЛИК
Пойтахтимизнинг “International Hotel Tashkent” меҳмонхонасида “Болалар учун ижтимоий ҳамкорлик: миллий ва халқаро тажрибалар” мавзусидаги халқаро форум ўтказилди. Бу форумда қатор вазирлик ва мутасадди ташкилотлар иштирок этдилар.
Халқаро форум ишида Ўзбекистон Республикаси Олий Мажлис Қонунчилик палатасининг сенатор ва депутатлари, вазирлик, идораларнинг, жамоатчилик ҳамда нодавлат ташкилотларнинг вакиллари, маҳаллий, шунингдек, хорижий экспертлар, амалиётчи мутахассислар иштирок этди.
Форум 1992 йил Ўзбекистонда ратификация қилинган БМТ нинг “Болалар ҳуқуқлари тўғрисида”ги Конвенцияси қабул қилинганлигининг 25 йиллиги, Республика болалар ижтимоий мослашув маркази фаолият олиб бораётганига 10 йил тўлиши муносабати билан тўпланган тажрибаларни акс эттиришга бағишланган.
Форумнинг асосий вазифаси, болаларнинг ҳуқуқ ва манфаатларини ҳимоя қилишга, соғлом ва баркамол авлодни шакллантиришнинг ҳуқуқий асосларини мустаҳкамлашга йўналтирилган ижтимоий шерикликнинг меъёрий-ҳуқуқий негизини такомиллаштириш бўйича тавсиялар ишлаб чиқишдан, шунингдек, амалдаги қонунчилик ва норматив актларга болаликни ижтимоий муҳофаза қилиш соҳасидаги халқаро ҳуқуқ меъёрларини инобатга олган ҳолда ўзгартириш ва қўшимчалар киритишдан иборат.
Чарос ХУШВАҚТОВА,
“Sog‘lom avlod” мухбири
