ТАСВИРЛАРГА МУҲРЛАНГАН ҲАМКОРЛИК
Ўзбекистон Бадиий академиясининг Марказий кўргазмалар залида Ўзбекистон ва Хитой рассомлари ҳамда фотоижодкорларининг кўргазмаси очилди.
Мамлакатларимиз ўртасида дипломатик алоқалар ўрнатилганига 22 йил тўлиши муносабати билан ташкил этилган мазкур кўргазманинг очилишида турли вазирлик ва идоралар, ижодий ташкилотлар, мамлакатимизда фаолият кўрсатаётган дипломатик корпус вакиллари, санъат намояндалари ва ихлосмандлари иштирок этди.
Ўзбекистон билан Хитой ўртасидаги ҳамкорлик барча соҳалар қатори маданият ва санъат йўналишларида ҳам изчил тараққий этиб бормоқда. Юртимизда Хитой рассомларининг бадиий ва фотокўргазмаларини ўтказиш, Хитойда эса Ўзбекистон санъати ютуқларини акс эттирган кўргазмалар, концертлар ташкил этиш яхши анъанага айланган.
Ўзбекистон хорижий мамлакатлар билан дўстлик ва маданий-маърифий алоқалар жамиятлари кенгаши ҳамда Хитой миллий рассомлик академиясининг “Буюк ипак йўли бўйлаб ижодкорлик: Ўзбекистондаги изланиш” номли қўшма лойиҳаси бўлган ушбу кўргазма мамлакатларимиз ўртасидаги маданий ҳамкорликнинг яна бир ифодаси бўлди. Икки мамлакат ижодкорлари томонидан яратилган бу асарларда Ўзбекистон билан Хитой ўртасидаги муносабатлар ривожи, ҳамкорликда турли жабҳаларда эришилган ютуқлар ўз аксини топган.
Кўргазмадан ўрин олган асарлар, ёрқин рангларда акс эттирилган турфа композициялар санъат ихлосмандларида катта таассурот қолдирмоқда.
И.УМАРОВА,
ЎзА мухбири
