Қишки Олимпия ўйинлари сари
Ўзбекистонлик спортчилар жорий йилнинг 7-23 февраль кунлари Россиянинг Сочи шаҳрида бўлиб ўтадиган XXII қишки Олимпия ўйинларида иштирок этади.
Мустақиллик йилларида мамлакатимизнинг илк Олимпия медали ҳам қишки спорт тури бўйича қўлга киритилган эди. 1994 йили Норвегиянинг Лиллехаммер шаҳрида ўтган XVII қишки Олимпия ўйинларида Лина Черязова чанғи акробатикаси бўйича олтин медалга сазовор бўлган. Спортчиларимиз 1998 йил Нагано (Япония), 2002 йил Солт-Лейк Сити (АҚШ), 2006 йил Турин (Италия), 2010 йили Ванкувер (Канада) шаҳарларида ўтказилган қишки Олимпия ўйинларида ҳам иштирок этган.
Бугунги кунда ёшларимиз ўртасида тоғ чанғиси, сноуборд, фристайл, фигурали учиш, хоккей каби қишки спорт турлари тобора оммалашиб бормоқда. Тошкент вилоятидаги Янгиобод, Чимён спорт базаларида чанғи, фристайл, сноуборд, пойтахтимиздаги “Айс ринк” сунъий муз қопламали спорт саройи ва “Айс авеню” муз саройида фигурали учиш ва хоккей машғулотларини ўтказиш учун барча шароит яратилган.
XXII қишки Олимпия ўйинларида спортчиларимиздан Миша Ге фигурали учиш, Артём Воронов ҳамда -Ксения Григорьева тоғ чанғиси мусобақаларида ғолиблик учун куч синашади.
Фигурали учиш бўйича мамлакатимизда кучли мактаб шаклланган. Етакчи спортчимиз Миша Ге 2013 йил март ойи-да Канадада бўлиб ўтган жаҳон чемпионатида муносиб иштирок этиб, Олимпиада йўлланмасини қўлга киритган эди. Тоғ чанғиси бўйича энг кучли спортчиларимиз – Артём Воронов ҳамда -Ксения Григорьева Янги Зеландияда ўтказилган халқаро турнирда Олимпиада лицензиясини қўлга киритган.
З.МАМАТҚУЛОВА тайёрлади
