Kichkintoylar Qomusimiz bilimdoni
“Bolajonlar hammangiz o‘z uyingizni yaxshi ko‘rasiz-a? Chunki unda biz o‘zimizni tinch va xotirjam his etamiz. Aytingchi, barchamizning umumiy uyimiz nima deb ataladi? – VATAN!!! Poytaxtimizning Yunusobod tumanidagi 486-maktabgacha ta’lim muassasasida Bosh Qomusimiz qabul qilinganining 21 yilligiga bag‘ishlangan bayram tadbiri tarbiyachining ana shunday so‘zlari bilan boshlandi.
. Bosh Qomusimiz qabul qilingan kun munosabati bilan yurtimizdagi ta’lim muassasalarida bayram kechalari, davra suhbatlari o‘tkazib kelinmoqda.
Yunusobod tumanidagi 486-maktabgacha ta’lim muassasasida tashkil etilgan “Konstitutsiya saboqlari” deya nomlangan bayram tadbiri ham ana shunday tadbirlarning uzviy davomidir. Kechada bolajonlar Vatanga, Bosh Qomusimizga, ota-onaga bo‘lgan hurmat va ehtiromlarini o‘zlarining she’rlari, raqslari va ijro etgan kuy-qo‘shiqlari orqali ifoda etishdi.
– O‘tkazilgan mazkur tadbir orqali bolalarimizning tasavvurida Konstitutsiyamiz haqida tushuncha hosil qilish, uning hayotimizda tutgan o‘rni muhim ekanligini qalbiga jo etishdan iborat, – deydi muassasa tarbiyachisi Shahnoza Sodiqxo‘jayeva.
Bolajonlar tomonidan tayyorlangan bayram tadbirida ishtirok etgan ota-onalar farzandlarining chiqishlaridan mamnun bo‘lishdi.
M.TOLIPOVA
