BAYROQ
18 noyabr – O‘zbekiston Respublikasi davlat bayrog‘i qabul qilingan kun
Yurtim bayrog‘ini vasf etar chog‘i,
Ko‘ngillar suv ichar, so‘zlarim — qayroq.
Tog‘laru bog‘larning dingdir qulog‘i,
Qo‘l silkir quyosh ham — eng ko‘hna bayroq…
Ko‘pirib-toshadi tomirlarda qon,
Uyg‘onib Alpomish otiga minar.
Nafasim bo‘g‘zimga tiqilar shu on,
Eng qattol dushmanim — mudroqlik sinar…
Bayroq bo‘lgim kelar bayroqqa boqib,
Bayroq bo‘lishgan-ku To‘maris, Shiroq.
Ozodlik darsiga qo‘ng‘iroq qoqib,
Jaloliddin kelar qo‘lida chiroq…
Qancha-qancha yurt bor bu olam aro,
Bayrog‘i bo‘lmasa barchasi bekor.
G‘aflatda yotmagay ozod fuqaro,
Chin bayroq uxlamas — hilpirar bedor…
Yurtim bayrog‘ini vasf etar chog‘i,
So‘nggi so‘zim budir: bayroq — muallim.
Paxta chanog‘iyu bug‘doy boshog‘i,
Shunday bo‘lsin deya boqib turar jim…
… Birdan potrab ketar tegramda qushlar,
Xonishlari tutar moviy osmonni.
Dunyo qo‘llarimdan mahkamroq ushlar,
Unga bayroq qilgum O‘zbekistonni!
Muhammad VALI
