Javohir – jahonning eng yosh xalqaro grossmeysteri
Vengriyaning Budapesht shahrida bo‘lib o‘tgan “First Saturday GM” xalqaro turnirida iqtidorli shaxmatchimiz Javohir Sindarov muvaffaqiyatli ishtirok etib, uchinchi grossmeysterlik talabini bajardi. U 12 yoshida jahonning eng yosh xalqaro grossmeysteriga aylandi.
Bundan bir yil oldin Javohir xalqaro shaxmat ustasi unvoniga sazovor bo‘lib, Prezidentimizning qimmatli sovg‘alarini qo‘lga kiritgan edi. O‘tgan bir yil ichida u o‘z ustida tinimsiz ishlab, joriy yilning iyun oyida “Voronej open-2018” xalqaro musobaqasida birinchi, sentyabr oyida Turkiyada o‘tkazilgan 20 yoshgacha bo‘lgan o‘smirlar o‘rtasidagi jahon chempionatida ikkinchi grossmeysterlik talabini bajargandi. Shunisi quvonarliki, Javohir 12 yosh 10 oy 8 kunda grossmeysterlik unvonini qo‘lga kiritib, jahon shaxmat tarixida S. Koryakindan (12 yoshu 7 oy) keyin ikkinchi, Osiyoda esa birinchi – eng yosh shaxmatchi sifatida o‘z nomini tarix yilnomalariga muhrladi.
Dunyoning eng yosh shaxmatchilari ro‘yxatining eng yuqori pog‘onasida yurtimizning ikki vunderkindi – Javohir va Nodirbeklarning turganligi qalbimizga g‘urur bag‘ishlashi bilan birga yaqin yillarda jahon shaxmat tojining yana yurtimizga qaytishiga umid uyg‘otadi.
T. ORTIQOVA
