Izlagan imkon topadi
O‘zbekiston yoshlar ittifoqi ma’lumotlariga ko‘ra, “Yoshlar – kelajagimiz” Davlat dasturi ijrosini ta’minlash bo‘yicha ishchi guruhlari tomonidan hududlarda 808 ming 179 nafar yigit-qizning ishsiz ekani aniqlanib, ularning 15 ming 21 nafariga amaliy yordam ko‘rsatilib, o‘zlari xohlagan ish bilan shug‘ullanishi uchun imkoniyat yaratildi.
Tadbirkorlik faoliyatini amalga oshirish bo‘yicha yordam so‘ragan yoshlarning 67 nafariga bo‘sh binolar, 1 ming 549 nafariga yer maydonlari ajratildi. 1 ming 784 nafar yosh tadbirkor sifatida ro‘yxatdan o‘tkazildi.
Mamlakatimizda yoshlar uchun har bir sohada, jumladan, tadbirkorlik sohasida ham keng ko‘lamli ishlar amalga oshirilmoqda. Xususan, hukumatimiz tomonidan yoshlar tadbirkorligi uchun imtiyozli kreditlarning ajratilishi ularga kelajakdagi faoliyatlari uchun muhim qadam bo‘lib xizmat qilmoqda.
Hozirda 21 yoshdaman. O‘zbekiston yoshlar ittifoqi Namangan viloyat Kengashi tavsiyasi bilan 13 foizli imtiyozli 500 million so‘m miqdoridagi kredit olib, bolalar poybzallarini ishlab chiqarishga mo‘ljallangan korxona tashkil etdim hamda o‘z faoliyatimni boshladim. Ayni vaqtda korxonamizda 35 nafar tengqur yoshlarni ish bilan ta’minlashga erishdim. Tez kunlarda ishchi o‘rinlari sonini ikki barobar oshirish oldimizda turgan asosiy maqsadlardan biridir. Bizning korxonamiz yil davomida 80 mingdan ziyod bolalar poybzallarini ishlab chiqarishni rejalashtirgan. Mahsulotlarimiz kelgusida ichki bozordan tashqari eksport uchun ham yo‘naltirilishini oldimizga maqsad qilib qo‘yganmiz. Yaqin kunlarda Rossiyaning yirik korxonasi bilan shartnoma imzolash arafasida turibmiz. Orzuim shu kichik korxonam orqali nafaqat o‘z oilaviy byudjetimga, balki yurtimiz taraqqiyotiga ham munosib hissa qo‘shishdir.
“Yosh bo‘lishingga qaramay bunday natijaga qanday erishding? Muvaffaqiyating kaliti nimada?” – deb menga juda ko‘pchilik savol beradi. Bularning barchasi hukumatimiz tomonidan biz yoshlarga qaratilayotgan e’tibor, xususan, ham moddiy ham ma’naviy yordam samarasidir. Yaratilayotgan imkoniyatlar qarshisida qo‘l qovushtirib o‘tirmaslik esa haqiqiy muvaffaqiyat kalitidir. Aytishadi-ku, “Izlagan imkon topadi” deb.
Muhammadali MA’RUFXONOV,
yosh tadbirkor
