O‘zbekistonda talabalar o‘rtasida matematika bo‘yicha xalqaro olimpiada o‘tkaziladi
O‘zbekistonda ikki yilda bir marta Islom Hamkorlik Tashkilotining Ilm-fan va texnologiyalar bo‘yicha doimiy qo‘mitasi hamda boshqa xalqaro tashkilotlar qo‘llab-quvvatlashi ostida oliy ta’lim muassasalari talabalari o‘rtasida matematikadan Muhammad Al-Xorazmiy nomidagi xalqaro olimpiadani o‘tkazish rejalashtirilmoqda.
Matematika bo‘yicha ilk olimpiada 2018 yil oktyabrining uchinchi o‘n kunligida Urganch shahrida bo‘lib o‘tishi kutilmoqda. Bellashuv yakunlariga ko‘ra g‘oliblar – O‘zbekiston Respublikasi fuqarolari oliy ta’lim muassasalari magistratura bosqichiga davlat granti asosida kirish huquqini qo‘lga kiritadi. O‘zbekiston Respublikasi fuqarosi bo‘lgan Olimpiada g‘olibi oliy ta’lim muassasasi bakalavriatini tugallagan vaqtdan boshlab, uch yil davomida mazkur huquqqa egalik qiladi.
