Кундузги оромгоҳларда мароқли ҳордиқ
Мамлакатимизнинг барча ҳудудларида бўлгани каби Тошкент шаҳрида ҳам болажонларнинг ёзги таътил вақтида мароқли дам олишини ташкил этиш бўйича кенг кўламли ишлар амалга оширилмоқда. Чилонзор туманидаги умумтаълим мактаблари қошидаги кундузги дам олиш масканлари фаолиятини кузатиб, бунга яна бир бор амин бўлиш мумкин. Бу ердаги спорт-соғломлаштириш майдончалари, тўгараклар, кутубхона ва маънавият хоналарида болаларнинг мароқли ҳордиқ чиқариши учун зарур шарт-шароитлар яратилган.
Шунингдек, болалар тарбиячилари билан бирга тумандаги 4-мактаб-интернатидаги ҳовузда мароқли ҳордиқ чиқаришмоқда. Сув ҳавзаси бўйида уюштирилган концерт дастурлари болалар кўнглига бир олам қувонч улашди. Кундузги оромгоҳлардаги китобхонлик машғулотлари, “Спорт – менинг ҳаётим”, “Саломатлик – туман бойлик” тадбирлари болажонларда қизиқиш уйғотмоқда.
