ОЛМАЛИ ЎРАМА ПИРОГ
Зарур маҳсулотлар: 300 гр. ун, 2 чой қошиқ хамирюмшатгич (разрыхлитель), 1 чой қошиқ туз, 150 гр. творог, 100 мл. писта ёғи, 100 мл. сут, 1 та тухум, 3 та олма, 0,5 стакан шакар.
Тайёрланиши: творог ва сутни суюқлиги ўртача ҳолга келгунча аралаштирамиз. Сўнг устига писта ёғидан солиб, яна аралаштиришда давом этамиз. Аралашмага ун, хамирюмшатгич ва тузни қўшамиз. Эластик хамир қорамиз. Хамир тингунча унинг ичига солинадиган масаллиқни тайёрлаб оламиз. Бунинг учун олмани арчиб, майда тўғраб оламиз. Хамирга ун сепиб, уни 45 мм қалинликда ёйиб, тахминан 6 см кенгликда тасмалар кесамиз.Тасмаларга олма бўлакларини қўйиб устидан шакар сепамиз. Хамир тасмаларининг ёнларини бириктириб, устини ёпиб чиқамиз. Олмали хамирларни пергамент қоғози тўшалган газ печи патнисига спирал шаклида ўраб жойлаштирамиз. Бунда хамирнинг уланган қисми прогнинг ички томонида қолиши лозим. Бундан ташқари оралиқда бироз бўш жой қолдириш зарур. Чунки пишиш жараёнида хамир катталашади. Пирогнинг устига тухум суриб, 180 даражагача қиздирилган газ печида тахминан 25 дақиқа давомида пиширамиз.
Ўрама пирогимиз тайёр.
ГУЛОЙИМ
