400 га яқин атлетчи Ўзбекистон очиқ кубогида иштирок этишди
Пойтахтимизда Ўзбекистон Республикаси Жисмоний тарбия ва спорт давлат қўмитаси ҳамда мамлакатимиз енгил атлетика федерацияси томонидан ташкил этилган енгил атлетика бўйича Ўзбекистон очиқ кубогида 400 га яқин спортчи ғолиблик учун кураш олиб борди.
Достон Сайдалиев, Анвар Саримсоқов, Ҳасан Акбаралиев, Андрей Петров, Гулҳаё Раҳимова, Сабина Толачева, Ситора Ҳамидова турли масофаларга югуриш бўйича ғолибликни қўлга киритди. Тўсиқлар оша югуришда Шоҳрух Баратов ва Анвар Сафаров биринчи ўринни эгаллаган бўлса, қизлар ўртасида Валентина Кибальникова олтин медаль билан тақдирланди.
Найза, ядро, диск ва босқон улоқтириш баҳсларида Иван Зайцев, Сергей Дементьев, Иван Маркелов, Суҳроб Хўжаев, Мушарраф Сайдаҳмедова, София Бурҳонова, Светлана Прошкина ҳамда Анастасия Асланду шоҳсупанинг энг юқори поғонасига кўтарилди.
Узунликка, баландликка ва уч ҳатлаб сакрашда Иван Денисов, Дмитрий Мельситов, Руслан Қурбонов, Оксана Молчанова, Виктория Дирдина, Надия Дўсановага тенг келадигани топилмади.
Ўн километр масофага спортча юриш бўйича куч синашган атлетлар ўртасида Асилбек Зокиров ва Паризода Набиева марра чизиғини биринчи бўлиб босиб ўтди. Ўнкураш беллашувларида Санжар Ниёзов, еттикураш баҳсларида эса Александра Юркевская ғалаба қозонди.
Н.НОРБОБОЕВ
