Sog‘liq, boylik, shodlik…
Bir gul bor – yashnab turar, qurimas, so‘lmas,
Bir nur bor – porlab turar, hech qachon so‘nmas.
Egilar – u, bukilar, ammo hech sinmas –
Bir kuch bor – eng qudratli, aslo yengilmaks.
Bu gul – Haqiqat,
Bu nur – Haqiqat.
Bu kuch – Haqiqat!
Bir qush bordir – hamisha yuksak parvozi,
Bir kuy bordir – yoqimli doimo sozi…
Bir so‘z bordir – o‘tkiru keskir ovozi,
Bir qo‘l bordir – eng kuchli dillar e’zozi.
Bir yo‘l bor – oydin, toza, ketkazar g‘amin,
Mehrdek chorlab turar, yancha alamni.
Bir tog‘ bor – hech qulamas, suyar odamni,
Bir cho‘g‘ bor – isitar butun olamni!
Bu gul – Iymondir,
Bu nur – Iymondir.
Bu kuch – Iymondir!
Adolatsiz – na taxtu, na baxt barqaror,
Gar nohalol mol-dunyo, davlat ham bekor!
Murodiga yetgay pok, imonli do‘st-yor,
Chin sevgili yurakda hamisha bahor!
To‘g‘rilik – sog‘lik,
Halollik – boylik,
Haq yo‘l, bu – shodlik!
Murod RAHMON
