“Ақлли” камера яратилди
Бугунги кунда кўплаб одамлар шахсий турар жой биноларини қўриқлаш мақсадида ўзига хос ҳимоя воситаларидан кенг фойдаланмоқда.
Шулардан энг кўп тарқалгани махсус кузатув камералари ҳисобланади. Айни пайтда бозорларда бу қурилмаларнинг турфа хилини учратиш мумкин.
Яқинда smanos UFO фирмаси Smart Home Camera (уй учун ақлли камера) номли янги кузатув камерасини фойдаланувчилар эътиборига ҳавола этди. Мазкур ном ускунага шунчаки қўйилмади. Биринчидан, унинг девайс корпуси ўзга сайёраликлар тарелкасига ўхшаш тарзда ишланган. Иккинчидан, у XXI асрнинг “Ақлли” қурилмаси саналади. Унинг ўзига хослиги шундаки, мазкур кузатув ускунаси ёрдамида 3600 майдонни кўздан кечириш мумкин.
Камера юқорига ўрнатилади ва фойдаланувчи унинг ёрдамида атрофда бўлаётган барча жараёнларни бемалол кузата олади. Агар қурилма хонада жойлашган бўлса, у атрофни тўлиқ “кузата” олади. Шунингдек, камера тунда ҳам махсус ёритиш воситалари орқали хонани назорат қилиб туриши мумкин. “Ақлли” қурилма уй эгасининг смартфон ёки планшетига тасвирни узатиб туриш имконига эга.
Хуршида ҲУСЕНОВА
