TIBBIYOTGA OID XALQARO KO‘RGAZMA
“O‘zekspomarkaz”da “Sog‘liqni saqlash – TIHE – 2016”, “Farmatsevtika sanoati – Apteka Expo Central Asia – 2016” hamda “Stomatologiya – Stomatology Uzbekistan – 2016” xalqaro ko‘rgazmalari ochildi.
Unda AQSH, Buyuk Britaniya, Germaniya, Hindiston, Xitoy, Koreya Respublikasi, Rossiya, Turkiya, Ukraina, Chexiya, Shveysariya, Belarus kabi o‘n yetti mamlakatning ikki yuzdan ziyod yetakchi kompaniyasi o‘z mahsulotlarini taqdim etmoqda.
Ekspozitsiyalardan turli zamonaviy tibbiy texnologiyalar, ultratovush, rentgen uskunalari, fizioterapevtik va kardiologik jihozlar, stomatologiya, implantologiya va jarrohlik asbob-anjomlari, diagnostika va laboratoriya jihozlari, dezinfeksiya, sanitariya-gigiyena va reabilitatsiya vositalari, trenajyorlar, ortopedik mahsulotlar, tibbiy mebellar, dori-darmonlar, dorixonalar uchun uskunalar, shifobaxsh pardoz vositalari va boshqa mahsulotlar o‘rin olgan.
Eslatib o‘tamiz, ko‘rgazmalar O‘zbekiston Respublikasi Sog‘liqni saqlash, Tashqi iqtisodiy aloqalar, investitsiyalar va savdo vazirliklari, O‘zbekiston Savdo-sanoat palatasi, “O‘zfarmsanoat” aksiyadorlik konserni, “O‘ztibtexnika” mas’uliyati cheklangan jamiyati, Stomatologlar uyushmasi va “ITE Uzbekistan” xalqaro ko‘rgazma kompaniyasi hamkorligida tashkil etildi.
M. TOLIPOVA
