SIFATNI UY EGASI HAM NAZORAT QILADI
Milliy matbuot markazida “Qishloq qurilish invest” injiniring kompaniyasi tomonidan qishloq joylarda namunaviy loyihalar asosida yakka tartibda uy-joy qurilishi dasturining ijrosiga bag‘ishlangan matbuot anjumanida shu haqda so‘z bordi.
2009–2015 yillarda 620 dan ziyod qishloq massivida 56 ming 500 dan ortiq ana shunday uy-joy barpo etildi. Joriy yilda takomillashtirilgan loyihalar asosida 1 million 800 ming kvadrat metrdan ziyod hajmdagi 13 mingta uy-joy barpo etish, uzunligi 900 kilometr ichimlik suvi, gaz va elektr tarmoqlari, 325 kilometr yo‘l qurish mo‘ljallanmoqda.
Yakka tartibdagi uy-joylar, madaniy-maishiy va infratuzilma ob’yektlarining qurilishini boshqarish, texnik kuzatuv va nazorat funksiyalari “Qishloq qurilish invest” injiniring kompaniyasi tomonidan amalga oshiriladi. Kompaniya tomonidan quriladigan uy-joylar qiymatining mo‘tadilligini ta’minlash maqsadida pudratchilarga yog‘och-taxta, tom yopqichlari, laminat, oyna, isitgich, ichki va tashqi bo‘yoq, gaz plitasi kabi o‘n ikki xildagi qurilish materiallari to‘g‘ridan-to‘g‘ri qurilish maydonlariga imtiyozli narxlarda yetkazib berilmoqda.
Matbuot anjumanida jurnalistlar o‘zlarini qiziqtirgan savollariga javob olishdi.
G. ShIRINOVA
