Shahar bilan bo‘ylashayotgan qishloqlar
Yuqori Chirchiq tumanidagi “Istiqlol” mahallasida namunaviy loyiha asosida barpo etilgan zamonaviy uy-joylar o‘zining saranjom-sarishta, ko‘rkamligi bilan ajralib turadi. Bir tekisda qurilgan binolar, keng, yorug‘ va fayzli ko‘chalarni ko‘rib ko‘zingiz quvnaydi, dilingiz yayraydi.
Toshkent-Chorbog‘ avtomobil yo‘lidan boraverishda, Yangibozor muyulishiga yetmasdan qad rostlagan mazkur uy-joylar aholining hayotini tubdan o‘zgartirib, ertangi kunga ishonchini yanada mustahkamladi. Yaqinda mazkur mahalla a’zolari bilan uchrashib, bunga amin bo‘ldik.
– Namunaviy loyiha bo‘yicha qurilgan turarjoylar hududimiz ko‘rkiga-ko‘rk qo‘shdi, – deydi mahalla raisi T.Quvondiqova. – Shunga hamohang odamlarimizning yashash sharoiti, ongu tafakkuri o‘sdi. Boshqacha aytganda, qishloq bilan shahar o‘rtasida farq qolmadi, desak xato bo‘lmaydi.
Mahallada yaratilgan shart-sharoitlar aholiga katta qulaylik tug‘dirmoqda. Bu yerda uchta oshxona, beshta do‘kon, tibbiyot maskani, dorixona, sartaroshxona, boshqa maishiy xizmat ko‘rsatish shoxobchalari faoliyat yuritmoqda.
Istiqlol mahallasida 3 mingdan ziyod aholi istiqomat qiladi. Uning qariyb 40 foizi voyaga yetmaganlar. Yoshlarning bo‘sh vaqti mazmunli o‘tishini ta’minlash maqsadida hududdagi 31-, 9– umumta’lim maktablarida turli fan va sport to‘garaklari, mahallada bolalar maydonchasi tashkil etilgan.
Mavzeda Transport va iqtisodiyot kasb-hunar kolleji joylashgan. Bu yil mahalladagi 20 nafar yigit-qiz shu ta’lim muassasasini tamomladi. Bitiruvchilar hududdagi fermer xo‘jaliklari va tikuv sexiga ishga olindi.
– Zamonaviy, barcha qulayliklarga ega, eng asosiysi, qishloq sharoitiga mos uy-joylarga ega bo‘lganimizga ham bir yil bo‘ldi-ya! – deydi Ziyoda Abdullayeva. – Maqtanayapti demangu xonadonlarimizdagi sharoitga shaharlik uy bekalar ham havas qilmoqda.
– Bank krediti foizi ham juda past, – deydi xonadonlardan birining egasi Zohid Ergashev. – Belgilangan tartib bo‘yicha, 15 yil ichida to‘lab boriladi. Bunday katta imtiyoz va imkoniyat tufayli qanchadan qancha oila yangi uyli bo‘ldi. Bu ishlarga bosh-qosh bo‘layotgan davlatimiz rahbariga ming rahmat.
Bu samimiy gaplar – Prezidentimiz rahnamoligida ozod va obod Vatan, erkin va farovon hayot barpo etish yo‘lidagi ezgu sa’y-harakatlarning hayotdagi yorqin ifodasi, hamyurtlarimiz ongu tafakkuridagi in’ikosi. Ko‘ngil obodligining oddiy ko‘rinishidir.
Bekzod HIDOYATOV,
O‘zA muxbiri
