Laganda-ya?
Uyimiz yaqiniga xorazmlik bir oila ko‘chib keldi. Oilaning bekasi juda xushmuomala, dilkash ayolligi bois tezda tanishib, do‘stlashib oldik. Bir kuni dugonamning kichik o‘g‘li eshigimizni taqillatib kelib qoldi.
– Oyim yubordilar? Lagan berib turarkansiz. Bizlarni cho‘miltirmoqchiydilar…
– Laganda-ya? Balki tog‘ora so‘ragandir, – hayratlanib so‘radim bolakaydan.
– Yo‘q, lagan bering, – dedi bola qoshlarini chimirib.
Mayli, dedim-u, oshxonadan ikkita lagan olib chiqdim.
Bolakayning hayrati yanada oshib, “Bunda ovqat yeydi-ku, bizga cho‘miladigan lagan kerak”, – dedi.
Keyin bilsam, Xorazmda tog‘orani “lagan” deyisharkan.
N.SAPAYeVA
