Charchoq bilan kurash: qaysi oziq-ovqatlar sizni tetiklantiradi?

Ko‘plab odamlar ish va shaxsiy hayotdagi majburiyatlar, yetarli uyquning yo‘qligi va noto‘g‘ri ovqatlanish tufayli charchoqni boshdan kechiradi. Bu faqat jismoniy holsizlik bilan cheklanmaydi, balki aqliy va hissiy charchashni ham o‘z ichiga oladi. Bu esa umumiy samaradorlik va hayot sifatini pasaytiradi.
Tanangizni to‘g‘ri energiya va zaruriy oziq moddalar bilan ta’minlash orqali charchoqni yengib o‘tish mumkin. Tabiiy va vitaminlarga boy oziq-ovqatlar iste’moli kun davomida tetik va faol bo‘lishga yordam beradi. Shu sababli, ratsioningizni qayta ko‘rib chiqish va sog‘lom ovqatlanishga e’tibor berish charchoqni kamaytirishning muhim qadamlaridan biridir.

Charchoqni yengib, tetiklashishga yordam beruvchi mahsulotlar asosan energiya darajasini ko‘taruvchi va tanaga zaruriy vitaminlar va minerallar bilan ta’minlovchi oziq-ovqatlardir. Quyida bunday mahsulotlarning ayrimlari, ularning foydalari, tarkibidagi vitaminlar va qachon iste’mol qilish kerakligi haqidagi ma’lumotlar bilan tanishasiz:

Banan: tez energiya beradi, chunki u tabiiy shakar va kaliyga boy bo‘lib, nonushtada yoki kunduzi bir-ikki dona yeyish tavsiya etiladi.
Vitaminlar: Vitamin B6, C vitamini, kaliy.

Yong‘oq va urug‘lar: ular oqsil, sog‘lom yog‘lar bilan ta’minlaydi, bu esa energiya darajasini barqaror ushlab turadi. Kun davomida 30-40 gramm yong‘oq yoki urug‘ iste’mol qilish mumkin.
Vitaminlar: E vitamini, B vitaminlari, magniy, omega-3 yog‘ kislotalari.

Suli (ovsyanka): u uglevodlarga boy bo‘lib, energiya uchun kerakli yoqilg‘ini ta’minlaydi va uzoq vaqt davomida to‘qlik hissini beradi. Nonushta uchun suli pyuresi iste’mol qilish tavsiya etiladi.
Vitaminlar: B vitaminlari, magniy, temir.

Qora shokolad: antioksidantlarga boy va kofein tarkibiga ega. Bu esa tetiklantiradi. Kichik bo‘laklarini tushdan keyin iste’mol qilish mumkin, lekin 30 grammdan oshmasligi lozim.
Vitaminlar: E vitamini, magniy, flavonoidlar.

Ismaloq: temirga boy, bu esa qon aylanishini yaxshilaydi va charchoqni kamaytiradi. Tushlikda ismaloq qo‘shish tavsiya etiladi.
Vitaminlar: A vitamini, C vitamini, temir, folat.

Yashil choy: kofein va L-teanin moddasi bilan tetiklantiradi va ongni xotirjam qiladi. Kun davomida ikki-uch piyola ichish mumkin, lekin uyqu vaqtiga yaqin ichishdan saqlanish lozim.
Vitaminlar: Antioksidantlar, polifenollar.

Sitrus mevalar: Ular (apelsin, limon, greypfrut) C vitamini va tabiiy shakar bilan ta’minlaydi, bu esa immunitetni oshiradi va energiya darajasini ko‘taradi. Nonushta yoki kun davomida bir-ikki dona meva iste’mol qilish mumkin.
Vitaminlar: C vitamini, folat.

Avokado: sog‘lom yog‘lar va B vitaminlari bilan energiya darajasini ko‘taradi va miya­da qon aylanishini yaxshilaydi. Nonushta yoki tushlikda yarimta avokado iste’mol qilish tavsiya etiladi.
Vitaminlar: E vitamini, B vitaminlari, K vitamini, folat.

Tabiiy yogurt: probiyotiklar bilan oshqozon-ichak trakti salomatligini yaxshilaydi va oqsil bilan energiya ta’minlaydi. Nonushta yoki kun davomida bir piyola iste’mol qilish mumkin.
Vitaminlar: B vitaminlari, kalsiy.

Qizil baliq: omega-3 yog‘ kislotalari bilan miyani va yurakni qo‘llab-quvvatlaydi, bu esa umumiy energiya va kayfiyatni yaxshilaydi. Haftada ikki-uch marta tushlik yoki kechki ovqat uchun iste’mol qilish tavsiya etiladi.
Vitaminlar: D vitamini, B vitaminlari, omega-3 yog‘ kislotalari.

Charchoqni yengib, tetiklashga yordam beruvchi mahsulotlarni ratsioningizga qo‘shish orqali energiya darajangizni oshirish va kun davomida faol bo‘lishingiz mumkin. Har xil turdagi vitamin va minerallarga boy bo‘lgan bu oziq-ovqatlar sog‘lig‘ingizni yaxshilashga va umumiy farovonligingizni oshirishga yordam beradi. Oziq-ovqatlarni muvozanatli va to‘g‘ri vaqtda tanovul qilishga e’tibor berish muhimdir.

Sevinch TUROPJONOVA