Оғиз ҳидланишига нима сабаб бўлиши мумкин?
Айрим вазиятларда жамоат орасида, одамлар билан мулоқот вақтида оғзимиздан нохуш ҳид келаётганини сезиб, ҳижолат тортамиз. Гоҳида бу ҳолат бот-бот такрорланаётганидан ҳаловатимиз йўқолади, аммо уни қандай бартараф этишни билмаймиз.
Оғиз ҳидланиши қандай хасталик? Унинг келиб чиқиш сабаблари нималардан иборат? ССВ Матбуот хизмати шу каби саволлар билан олий тоифали стоматолог-шифокор Мирафзал Ирхановга мурожаат қилди.
– Оғиздан нохуш ҳид келиши галитоз ҳолатидир. Катта ёшдагиларнинг ҳар тўрттадан биттасида эса галитоз доимий тарзда кузатилади. Кўпинча одам нохуш ҳидга тез кўникади ва кейинчалик уни умуман сезмайдиган бўлиб қолади.
Муаммодан хабари борлар эса одамлардан ўзини олиб қочишга уринади ёки руҳан тушкунликка берилиши ҳам мумкин. Оғизда нохуш ҳид пайдо бўлдими, зудлик билан унинг сабабини аниқлаш ва даво чораларини қўллаш лозим.
– Галитоз ҳолатига нималар сабаб бўлади?
— Овқат қолдиқлари тишлар, милклар, милк четлари ва тилда яшовчи бактериялар таъсирида чириб, ёқимсиз ҳид чиқаради. Тиш тошлари ва бактерияларнинг жуда кўплиги, тиш протезининг унчалик тоза бўлмаслиги ҳам галитозга олиб келиши мумкин.
Баъзи дориларни ичиш сўлак безларининг касалланишига сабаб бўлади, бунинг оқибатида эса оғиз қуриши юзага келади. Бунда оғиз бўшлиғида сўлак етишмайди, қарабсизки, оғиздан ёқимсиз ҳид анқийди.
– Қайси маҳсулотлар сабаб оғиздан нохуш ҳид келиши мумкин?
– Тишларингиз тозалигидан ярқираб кетган, тилингиз ҳам ҳақиқий мусаффоликдан баҳраманд бўлишига қарамай, нохуш ҳид сизни ҳамон тарк этмаслиги мумкин. Бунга тановул қилинган озиқ-овқатлар сабаб бўлиши мумкин.
Пиёз, саримсоқ пиёз ёки бошқа кучли ҳидга эга озуқалар истеъмол қилинса, 72 соатгача уларнинг ҳиди инсон нафасида сезилади. Кофе каби ичимликлар ҳам нохуш ҳидларга сабаб бўлади. Шунингдек, тамаки чекиш нохуш ҳид ва оғиз қуришига олиб келади.
Агар оғзингиздан бот-бот нохуш ҳид келаётган бўлса, одатда у бирор хасталикнинг белгиси бўлади. Шу боис, бундай вазиятда оилавий шифокорга мурожаат қилишингизни тавсия қиламиз.
Соғлиқни сақлаш вазирлиги
Матбуот хизмати
