Фантастик фильмларнинг ҳақиқатга айланиши
Google Glass – Google компанияси томонидан ишлаб чиқилган кўзойнакдир. Уни шу йил сотувга чиқариш режалаштирилган. Кўзойнак овозли буйруқларни бажаришга қодир. Унинг барча имкониятларидан тўлиқ фойдаланиш учун уни Wi-Fi ёки смартфонингиздаги уяли алоқага улаш лозим. Google Glass ҳақида тўлиқ тасаввурга эга бўлиш учун унинг асосий функциялари билан қуйида танишинг:
Суратга тушириш
«Ok, Glass, take a picture» (Хўш, Гласс, суратга ол) буйруғи берилганида, кўзойнак автоматик равишда суратга тушира бошлайди. Видео ёзиш учун эса тегишли буйруқ берилса кифоя. Ушбу функциянинг моҳияти шундаки, сиз фурсатни қўлдан бой бермаган ҳолда, қўлларингиз ёрдамисиз суратга туширишингиз мумкин.
Google қидирув хизмати
Овозли буйруқ орқали фойдаланувчилар Google Glassдан маълум обектни аниқлаб беришини сўраши мумкин. У ҳақидаги ахборот «олд ойна»да намоён бўлади. Саёҳат вақтида эса аэропортдаги самолёт ҳолати ва йўналишлар бандлиги даражаси каби маълумотлар доимо кўз олдингизда акс эттирилади.
Қадам-бақадам навигация
Бошқа навигацион дастурлардан фарқли ўлароқ, Google Glass ҳаракат кўрсаткичларини тўғри кўз олдингизда бўлиб туришини таъминлайди. Шунингдек, Google Mapsнинг бошқа хусусиятларидан ҳам фойдаланади.
Овозли таржимани амалга ошириш
Айтайлик, сиз «раҳмат» сўзининг япон тилидаги таржимасини билмоқчисиз. Унда Glassга «Хўш, Glass, Googleдан «япончада раҳмат» деб изла» (Ок оk, glass, google say thank you in japanese) деган буйруқни беришингиз кифоя.
Виртуал эслатмалар
Google Glassнинг бу борада оддий смартфондан фарқи шундаки, у визуал хусусиятга ҳам эгадир. Масалан, маълум бир объектга қараб, шу ҳақида эслатиш буйруғи берилиши мумкин. Ва албатта, эслатмаларни календарингизга киритиб қўяди.
Glass орқали суҳбат
Google Glass ҳам овозли, ҳам видео суҳбатларни амалга ошириш имконини беради. Бундан ташқари, алоқадаги суҳбатдошга ўзингиз кўриб турган барча нарсани кўрсатишингиз мумкин. Бу имкониятдан фойдаланиб, воқеа жойидан тўғридан-тўғри репортаж олиб боришингиз мумкин.
Имо-ишора орқали бошқарув
Google ўз кўзойнагини юз ва бошнинг оддий ҳаракатлари орқали бошқаришга мослаштирган. Масалан, кўз ҳаракати ёрдамида экранни ёқиш мумкин. Бошни энгаштириш билан эса экранни «варақлаш» мумкин.
Интернет материаллари асосида тайёрланди
