СИФАТНИ УЙ ЭГАСИ ҲАМ НАЗОРАТ ҚИЛАДИ

Миллий матбуот марказида “Қишлоқ қурилиш инвест” инжиниринг компанияси томонидан қишлоқ жойларда намунавий лойиҳалар асосида якка тартибда уй-жой қурилиши дастурининг ижросига бағишланган матбуот анжуманида шу ҳақда сўз борди.

2009–2015 йилларда 620 дан зиёд қишлоқ массивида 56 минг 500 дан ортиқ ана шундай уй-жой барпо этилди. Жорий йилда такомиллаштирилган лойиҳалар асосида 1 миллион 800 минг квадрат метрдан зиёд ҳажмдаги 13 мингта уй-жой барпо этиш, узунлиги 900 километр ичимлик суви, газ ва электр тармоқлари, 325 километр йўл қуриш мўлжалланмоқда.

Якка тартибдаги уй-жойлар, маданий-маиший ва инфратузилма объектларининг қурилишини бошқариш, техник кузатув ва назорат функциялари “Қишлоқ қурилиш инвест” инжиниринг компанияси томонидан амалга оширилади. Компания томонидан қуриладиган уй-жойлар қийматининг мўътадиллигини таъминлаш мақсадида пудратчиларга ёғоч-тахта, том ёпқичлари, ламинат, ойна, иситгич, ички ва ташқи бўёқ, газ плитаси каби ўн икки хилдаги қурилиш материаллари тўғридан-тўғри қурилиш майдонларига имтиёзли нархларда етказиб берилмоқда.

Матбуот анжуманида журналистлар ўзларини қизиқтирган саволларига жавоб олишди.

Г. ШИРИНОВА