Депрессия юракка зарар етказади
Юрак-қон томир касалликларининг ривожланишини ўрганиб чиққан германиялик олимлар депрессия юрак учун худди семизлик ва холестерин кўплиги каби зарарли эканини аниқлади. Текширув натижалари Atherosclerosis ижтимоий журналида эълон қилинди.
Мюнхен институти профессори Карл Хайнц ҳамкасблари билан бирга 45–74 ёш оралиғидаги 3428 нафар эркак беморнинг маълумотларини ўрганиб чиқди ва уларнинг ҳолатини 10 йил давомида кузатиб борди.
Профессорнинг сўзларига қараганда, юрак касалликлари билан боғлиқ энг хавфли омиллар гипертония ва чекиш саналади. Агар бутун аҳоли ҳисобга олинса, депрессия туфайли юзага келган юрак қон-томир касалликлари натижасида юз берган ўлим сони 15 фоизни, холестерин кўплиги, семириш ва чекиш натижасидаги касалликдан вафот этганлар сони эса 8,4 – 21,4 фоизни ташкил этди.
Бундан ташқари, анча вақт олдин олимлар бу боғлиқлик фақат бир томонлама эмаслигини исботлаганди. Оғир касалликларга нисбатан руҳий реакция ҳам беморнинг соғайишини қийинлаштирувчи депрессив касалликларга сабаб бўлиши мумкин. Шунинг учун тадқиқотчилар бу жиҳатларга ҳам эътибор қаратишни таъкидлайди.
Миржалол Мадвалиев тайёрлади.
