E’tirofga munosiblar taqdirlandi
“Istiqlol” san’at saroyida madaniyat, san’at, badiiy ijod, jurnalistika va sport sohalari sohalarida salmoqli yutuq va muvaffaqiyatlarga erishgan bir guruh ijodkorlar, hunarmandlar va sportchilarni “E’tirof – 2016” mukofoti bilan taqdirlash marosimi bo‘lib o‘tdi.
Mazkur tadbir uch yildan buyon o‘tkazib kelinmoqda. Bu yil ilk bor har bir yo‘nalish bo‘yicha hakamlar hay’ati nomzodlarga onlayn ovoz berdi. Bu g‘oliblarni aniqlash jarayonini tomoshabinlar ko‘z o‘ngida ochiq va oshkora o‘tkazish, bu borada turli noxolisliklar va bir yoqlama yondashuvlarga yo‘l qo‘ymaslik maqsadida tashkil qilindi. Bu yil mukofotga nomzodlar qirq to‘qqiz nominatsiya bo‘yicha aniqlanib, sovrindorlarga “E’tirof – 2016” mukofotining statuetkasi va diplomi topshirildi.
