Guliston davlat universitetida Samad Vurg‘un nomidagi Ozarbayjonshunoslik auditoriyasi yaratildi
Ozarbayjonning O‘zbekistondagi elchixonasi huzuridagi Haydar Aliyev nomidagi Ozarbayjon Madaniyat markazi loyihasi doirasida Guliston davlat universitetida Ozarbayjonning atoqli shoiri, dramaturgi va jamoat arbobi, xalq shoiri Samad Vurg‘un nomini olgan Ozarbayjonshunoslik auditoriyasi yaratildi.
Loyiha Ozarbayjon Prezidenti Ilhom Aliyevning Samad Vurg‘unning 120 yillik yubileyi nishonlanishi bilan bog‘liq tegishli farmoniga muvofiq amalga oshirilmoqda.Ozarbayjon Madaniyat markazi direktori Akif Marifli bildirdiki, Samad Vurg‘un nomidagi Ozarbayjonshunoslik auditoriyasining yaratilishi Ozarbayjon va O‘zbekiston orasida madaniy va ilmiy aloqalarning rivojlanishiga muhim hissa qo‘shadi. U shuningdek, Ozarbayjon va O‘zbekiston Prezidentlari tomonidan amalga oshirilgan yuqori darajali siyosiy muloqot va o‘zaro hamkorlik bunday gumanitar loyihalarning amalga oshirilishi uchun qulay sharoit yaratayotganini ta’kidladi.
Direktorning so‘zlariga ko‘ra, tashkil etilgan auditoriya talabalarning Ozarbayjon tili, adabiyoti, tarixi va madaniyati bilan yanada yaqinroq tanishishi, hamda qo‘shma ilmiy va madaniy loyihalarning amalga oshirilishi uchun muhim platforma bo‘lib xizmat qiladi.
Sirdaryo viloyati hokimi o‘rinbosari Shohrux Isakulov va universitetning birinchi prorektori Kozim Kudratov Ozarbayjon va O‘zbekiston xalqlari orasida mavjud bo‘lgan qadimiy do‘stlik va madaniy aloqalarning ahamiyatini ta’kidladilar. Ular bunday Ozarbayjonshunoslik auditoriyasining yaratilishi talabalarning Ozarbayjon tili, adabiyoti va madaniyati haqida kengroq ma’lumot olishiga, shuningdek, ikki mamlakat oliy ta’lim muassasalari orasida ilmiy-gumanitar hamkorlikning rivojlanishiga hissa qo‘shishini qayd etdilar.
Auditoriyaning tashkil etilishi doirasida universitetga Ozarbayjon adabiyoti, tarixi va madaniyatining boy merosini aks ettiruvchi kitoblar, foto materiallar va turli taqdimot vositalari sovg‘a qilindi.
Zebo NAMOZOVA
