Pastdarg‘omda yangi terapiya majmuasi
Samarqand viloyati Pastdarg‘om tuman tibbiyot birlashmasining 100 o‘ringa mo‘ljallangan yangi terapiya majmuasi foydalanishga topshirildi.
Majmuaning qurilishiga respublika investitsiya dasturi doirasida 3 mlrd. 900 mln. so‘m mablag‘ sarflandi. Uch qavatli mazkur binoda bemorlar va shifokorlar uchun barcha sharoit va kerakli tibbiy uskunalar mavjud. Unda tuman markaziy shifoxonasining terapiya, kardiologiya, nevrologiya, endokrinologiya, fizioterapiya bo‘limlari faoliyat ko‘rsatadi.
– Ushbu majmuaning ochilishi aholi salomatligiga qaratilayotgan e’tibor natijasidir, – deydi viloyat hokimi o‘rinbosari Rustam Qobilov. – Bu bino pastdarg‘omlik tibbiyot xodimlarining kasb bayramiga tayyorlangan tuhfa bo‘ldi.
Tadbir davomida uzoq vaqtdan buyon xizmat qilib kelayotgan, sohaga katta mehnati singgan xodimlarga qimmatbaho sovg‘alar va faxriy yorliqlar topshirildi.
