Ўзбекистонда Ихтирочи аёллар уюшмаси ташкил этилди
Ўзбекистонда хотин-қизларга оид давлат сиёсатининг устувор йўналишларини амалга ошириш ҳамда Ўзбекистон Хотин-қизлар қўмитасининг олдида турган муҳим мақсад ва вазифаларини самарали ташкил этиш мақсадида Қўмита ва унинг худудий бўлимлари қошида Ўзбекистон Ихтирочи аёллари уюшмаси ташкил этилди. Бу ҳақда Ўзбекистон Хотин-қизлар қўмитаси ахборот хизмати хабар бермоқда.
Қўмита ва Уюшма томонидан республика бўйлаб иқтисодиёт тармоқларининг турли йўналишларда ихтирочилик ва рационализаторлик фаолияти билан шуғулланаётган, илмий-тадқиқот ишлари олиб бораётган, ўз қобилиятини намоён этаётган иқтидорли хотин-қизларни излаб топиш, янги иқтидор қирраларини очиш, олима аёллар, докторант, мустақил изланувчи, иқтидорли талаба, ихтирочи, инженер, конструктор, рационализатор ва мутахассис хотин-қизларни илмий техник ижодкорликка кенг жалб қилиш режалаштирилган.
Хотин-қизларнинг изланишларини мақсадли йўналтириш, ихтирочилик ва илмий-ижодий фаолиятларини қўллаб-қувватлаш мақсадида “Ўзбекистон аёлларининг 100 та инновацион лойиҳаси” I республика танловини ўтказиш, танлов ғолибларини моддий ва маънавий рағбатлантириш бўйича ишлар ҳам амалга оширилмоқда.
