4 декабрь – Ўзбекистон Республикаси Президенти сайлови куни
Жорий йилнинг 4 декабрь куни ўтадиган Ўзбекистон Республикаси Президенти сайловини кузатиш учун мамлакатимизга келган хорижий давлатлар ва халқаро ташкилотлар вакиллари жойларда бўлиб, ушбу сиёсий тадбирга кўрилган тайёргарлик ишлари билан танишмоқда.
Европада хавфсизлик ва ҳамкорлик ташкилоти (ЕХҲТ) Демократик институтлар ва инсон ҳуқуқлари бўйича бюросининг (ДИИҲБ) Ўзбекистон Республикаси Президенти сайловини кузатиш бўйича миссияси узоқ муддатли кузатувчилари Всеволод Перевозчиков ва Хартвиг Гантрам Ганс Кабоз Ўзбекистон Республикаси Президенти сайловини ўтказувчи 1-Қорақалпоғистон округ сайлов комиссияси аъзолари билан учрашди.
Европада хавфсизлик ва ҳамкорлик ташкилоти (ЕХҲТ) Демократик институтлар ва инсон ҳуқуқлари бўйича бюросининг (ДИИҲБ) Ўзбекистон Республикаси Президенти сайловини кузатиш бўйича миссияси узоқ муддатли кузатувчилари Жиззах вилоятида сайловга тайёргарлик жараёни билан танишмоқда.
Ўзбекистон Республикаси Президенти сайловини ўтказувчи 4-Жиззах округ сайлов комиссиясида ушбу миссия вакиллари Александр Пашедко ва Торил Ланд билан учрашув бўлиб ўтди.
Ўзбекистон Республикаси Ахборот технологиялари ва коммуникацияларини ривожлантириш вазирлигида Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси кузатувчилари миссияси раҳбари Йохан Петер Трауготт Тейлер билан учрашув бўлиб ўтди.
Миссия экспертлари мамлакатимизда электрон ҳукумат тизими ва замонавий ахборот-коммуникация технологияларининг ривожи ва истиқболлари билан таништирилди.
ЎзА материаллари асосида тайёрланди
