ТЕРМА ЖАМОАМИЗ КУМУШ МЕДАЛЬ СОҲИБИ
Тошкентда мини-футбол бўйича ўтказилган Осиё чемпионатида Ўзбекистон терма жамоаси кумуш медални қўлга киритди.
Ўзбекистон учинчи бор мезбонлик қилган мини-футбол бўйича Осиё чемпионатида қитъамизнинг 16 терма жамоаси совринли ўринлар ва Колумбияда ўтадиган жаҳон чемпионати йўлланмаси учун баҳслашди.
Ўзбекистон терма жамоаси аъзолари гуруҳ босқичидаги учрашувларда Саудия Арабистони, Қирғизистон ва Ливан терма жамоалари устидан ишончли ғалаба қозонди ва тўққиз очко жамғарган ҳолда гуруҳда биринчи ўринни эгаллаб, чорак финалга чиқди. Чорак финалда Ироқ, ярим финалда эса Таиланд футболчилар устидан ғалаба қозонишди. Ҳал қилувчи финал баҳсида Эрон терма жамоасига кичик ҳисобда имкониятни бой берган футболчиларимиз Осиё чемпионатининг кумуш медалига сазовор бўлди.
Осиё чемпионатида муваффақиятли қатнашган энг кучли беш жамоа – Ўзбекистон, Эрон, Таиланд, Вьетнам ва Австралия терма жамоалари жорий йилнинг сентябрь-октябрь ойларида Колумбияда бўладиган жаҳон чемпионатида иштирок этади.
Т. ОРТИҚОВА
