Ҳаракатларсиз озиш
Ортиқча вазн ҳар доим инсонлар учун муаммо бўлиб келган. Ундан халос бўлишнинг турли усуллари мавжуд бўлиб, асосан, парҳез тутиш ва спорт билан мунтазам шуғулланиш лозим.
Аммо бу усуллар инсондан кўп ҳаракат этади ва бир вақтнинг ўзида ниҳоятда сабрли бўлишни талаб этади. Шу сабабдан ундан фойдаланиш учун кўпчилик ўзида ирода топа олмайди. Аммо, яқинда олимлар озиш учун ортиқча ҳаракат ва харажатларнинг ҳожати йўқлигини исботлашди.
Ортиқча вазн йиғмаслик учун фақатгина нонуштани ўтказиб юбормаслик кифоя қилади. Айнан нонуштада яхшилаб овқатланиб олиш инсонга озишда ёрдам беради. Нега дейсизми? Чунки, нонуштада қоринни яхшилаб тўқлаб олиш кун давомида очликка чидашимиз учун анчагина қувват бағишлайди. Тадқиқотлар натижасида нонуштани умуман қолдирмайдиган инсонлар ортиқча вазн тўплаш билан боғлиқ муаммога деярли дуч келишмаслигини исботлади.
Очлик билан ортиқча вазндан қутулиш яхши самара бермайди. Зеро, узоқ вақт оч юриш саломатлик учун жиддий зарар етказиши мумкин. Тиббий томондан қаралганда меъда беш соатдан ортиқ бўш қолмаслиги лозим.
Шу билан бир қаторда жисмоний фаолликсиз ўйланган мақсадга етишиб бўлмайди. Агар сизда спорт залига чиқиб шуғулланишга вақт бўлмаса, тушкунликка тушманг. Ҳаракат қилишдан тўхтаманг. Масалан, лифтдан фойдаланиш ўрнига юқори қаватга зиналардан кўтарилинг. Бир кун давомида камида 30 дақиқа жисмоний фаол бўлиш ҳам сизга жуда катта ёрдам беради.
Катта ёшли одам бир кунда 2000 – 2500 калорияли озиқ-овқат маҳсулотларини истеъмол қилиши ва шунча йўқотиши лозим. Бу нарсага алоҳида эътибор беринг. Макарон, газланган ширин ичимликлар, ширинликларни истеъмол қилишдан иложи борича тийилган маъқул. Овқатланиш тартибида асосан мева-сабзавот ва ёғсиз гўштнинг бўлиши ортиқча вазн йиғилмаслигига ёрдам беради.
