МТМда беллашув

Болалар турли ўйинлар орқали дунёни англайди. Ўйин уларни ҳам жисмонан, ҳам маънан етук бўлишига ҳисса қўшади.

Тошкент шаҳар Учтепа туманида жойлашган 328-МТМда “Соғломжон – полвонжон” шиори остидаги мусобақа ҳам ана шу эзгу мақсадларни кўзлаган ҳолда ўтказилди. Тайёрлов гуруҳидаги болалар: “Чемпионлар” ва “Эльбурс” номи билан икки гуруҳга бўлиниб, ўзаро куч синашишди. Ташкил этилган мусобақа шартлари бир-биридан қизиқарли ва шиддатли тарзда ўтиб, болажонлар беллашув орқали ўзларининг нечоғли эпчил ва чаққон эканини намоён этишди. Спорт байрамига таклиф этилган маҳалла фаоллари, ота-оналар сўзга чиқиб, болажонлар томонидан тайёрланган қувноқ беллашув ҳақида ўзларининг илиқ фикрларини билдиришди.

Тадбир сўнггида муассаса раҳбарияти томонидан иштирокчи болажонларга эсдалик совғалари топширилди.

Шаҳноза КАРИМОВА