Стрессдан қутилиш мумкинми?
Инсон руҳий ва жисмоний толиқишга учрайди. Бу маълум муддат ўтгач, ўрнига тушади. Баъзан иш фаолиятида ким биландир зиддиятга бориш, фавқулодда ҳодисанинг рўй бериши, белгиланган режаларнинг барбод бўлиши, кимгадир ишониб, алданиб қолиш психологияда стресс деб аталиши барчамизга маълум. Уни енгиш анча қатъий иродани талаб қилади. Психологлар кайфиятни кўтариш ва стресс ҳолатидан чиқиш учун қуйидагиларни тавсия қиладилар:
– стресс ҳолатини “боксчи” каби қўлларни муштлаган ҳолатда кутиб олманг, балки ўзингизни эркин тутинг;
– “Мен бугун ҳаяжонга берилмайман. Эртага албатта, яхши кун келади” шиорига амал қилинг;
– ўзингизни бугун кечагига қараганда кўпроқ яхши кўринг, яъни ўзингизни эҳтиёт қилинг;
– кайфиятингиз ёмон бўлса-да, ўзингиз учун хурсандчилик уюштиринг;
– нохуш ҳолатга учрадингизми, сиқилманг, бирор яқин кишингизга дардингизни айтинг, енгил тортасиз. Стресс ҳолатини якка ўзингиз маҳв этишга уринманг.
