Osudalikda
Umid shu’lalanar ma’sum ko‘zlarda,
Oftobday – har dilga u yoqqan chiroq.
Ko‘ksiga sig‘magan mitti yuragi
Borliqni poklikka to‘ldirguday oq.
Chopqillab charchamas ostonada Baxt,
Barmog‘ida sanar dunyoning sirin.
Osmon shivirlaydi osudalikda:
“O, Zamin, halovat boladay shirin.”
Bola sevgisiday ulkan sevgi yo‘q,
Yeru ko‘kni asrar tilagi bordir.
Kichkina demangiz, kaftida quyosh,
Vatan suyanguday yuragi bordir!
Dilorom UZRO
