Til o‘rgatishda samarali yondashuv

2014 yilda “Yilning eng yaxshi fan o‘qituvchisi” respublika ko‘rik-tanlovida oliy o‘rinni egallagan Gulshana Mahmudova NamDUning xorijiy filologiya fakultetini tamomlab, Namangan shahridagi 6-ixtisoslashgan umumta’lim maktabida ingliz tili fanidan dars bera boshlaganiga ham o‘n yil to‘ldi.

Davlatimiz rahbarining 2012 yil 10 dekabrda qabul qilingan “Chet tillarni o‘rganish tizimini yanada takomillashtirish chora-tadbirlari to‘g‘risida”gi qarori ijrosi doirasida viloyat umumta’lim maktablari o‘qituvchilari uchun tashkil etilgan “Ingliz tilini o‘qitishda yangi pedtexnologiya va AKTdan foydalanish” mavzuidagi seminarda Gulshana murabbiy sifatida ish olib bordi.

– Har bir o‘quvchi bilan individual shug‘ullanishga harakat qilaman, – deydi G.Mahmudova. – Darsda multimedia vositalaridan keng foydalanaman. O‘quv mashg‘ulotlarini shu tarzda tashkil etish o‘z samarasini bermoqda: yaqinda 1-sinf o‘quvchilari o‘rtasida so‘rov o‘tkazilganda, ingliz tili fanini o‘zlashtirish 84 foiz oshgani ma’lum bo‘ldi.

Hotam MAMADALIYEV

(O‘zA) olgan surat.