Barkamol avlod
Farzand shirin, ulg‘aysa sog‘lomu oqil,
Oilaga tayanchdir – bo‘lsa u qobil.
Chuqur bilim, hunardan baxtiyor ko‘ngil,
Vatanni etar obod – barkamol avlod!
Bo‘lsin yoshlar zamonning zo‘r bilimdoni,
Fan, texnika asrining yetuk sultoni.
Zakovatu zukkolik – qudrat imkoni,
Vatanni etar obod – barkamol avlod!
Yigit-qizlar yuz hunar etsin namoyon,
G‘olib, polvon, mardlarga tan bersin jahon!
O‘tkir zehnu malaka – zafar begumon,
Vatanni etar obod – barkamol avlod!
Kim quvonmas o‘g‘li gar bo‘lsa chempion,
Topsa qizi mehnat-la hurmat, sharaf-shon?!
Yurt faxridir dilbandi bo‘lsa Qahramon,
Vatanni etar obod – barkamol avlod!
Yana yetishsin buyuk Amir Temurlar,
Ibn Sino, Navoiy, yana Boburlar.
Dunyoga chiqsin ulug‘, olim, shoirlar,
Vatanni etar obod – barkamol avlod!
Tuzatolmas noshudni, Murod, zar-tillo,
Farzandga ezgulikni ko‘raylik ravo.
Mukammal kasb, odobdan ko‘p ekan ma’no,
Vatanni etar obod – barkamol avlod!
Murod RAHMON
