Тиббиёт муассасалари раҳбарлари ҳоким томонидан тайинланади
Тошкентдаги тиббиёт марказлари бош шифокорлари, шаҳар Соғлиқни сақлаш бош бошқармаси, шаҳар диагностика маркази ва туманлар тиббиёт бирлашмалари раҳбарияти шаҳар ҳокими томонидан тайинланади.
Тошкент хотин-қизлар қўмитаси раиси Фарида Абдураҳимованинг қайд этишича, Ўзбекистон Президенти Шавкат Мирзиёев 7 февраль куни шу ҳақда қарор қабул қилган. Аввал тайинлаш ҳуқуқи Соғлиқни сақлаш вазирлигига тегишли эди. Тошкент шаҳар ҳокими Раҳмонбек Усмоновнинг 17 февралдаги қарорида бир жойда 10 йилдан ортиқ фаолият олиб борган раҳбарларни ротация қилиш механизмини татбиқ этиш кўзда тутилган. Ҳужжат билан тиббиёт муассасалари ходимларини аттестациядан ўтказиш ҳам режалаштирилган.
