КЕКСАЛАР ДОИМО ЭЪЗОЗДА
Уруш ва меҳнат фронти фахрийларининг тиббий соғломлаштириш даражаси ва сифатини оширишда Ўзбекистон Касаба уюшмалари федерацияси кенгаши ҳам фаол иштирок этмоқда. Тизимдаги санаторийларнинг моддий-техник базасини мустаҳкамлаш, уруш ва меҳнат фронти фахрийларини соғломлаштириш учун қулай шарт-шароитлар яратиш, хизмат кўрсатиш даражасини янада ошириш доимий эътиборда. Хусусан, яқинда бир қатор санаторийларда янги даволаш ва ётоқ бинолари фойдаланишга топширилди.
Тошкент вилоятининг Қибрай туманида жойлашган “Ботаника” санаторийсида ҳам бунёдкорлик юмушлари бажарилди. Натижада замонавий талабларга жавоб берадиган даволаш ва ётоқ бинолари, физиотерапевтик даволаш бўлими барпо этилиб, кўрсатилаётган хизматлар сифати ва самарадорлиги янада оширилди.
2015 йил мамлакатимизда “Кексаларни эъзозлаш йили”, деб эълон қилингани ушбу йўналишдаги ишлар кўламини янада оширишга хизмат қилади. Президентимиз таъкидлаганидек, қайси хонадонда нуроний отахон ёки онахон бўлса, бу оилада албатта файзу барака, фаровонлик, аҳиллик бўлади.
Дарҳақиқат, она Ватанимизнинг тинчлиги, осойишталиги, осмонимиз мусаффолиги кекса отахон ва онахонларимизнинг дуолари ижобатидир. Шу боис мўътабар боболаримиз ва момоларимизни, ота-оналаримизни рози қилиш, уларнинг дуосини олиш – дунёдаги энг улуғ, энг савобли иш демакдир.
Васила ПЎЛАТОВА
