Чилида дунёдаги энг йирик телескоп қурилиши бошланди
Чилида 26 май, жума куни мамлакат президенти Мишель Бачелет томонидан дунёдаги энг йирик телескоп қурилишига старт берилди, деб ёзади “ТАСС”.
Экзосайёраларни тадқиқ этиш учун мўлжалланган қурилма “Европа экстремал катта телескопи” (European Extremely Large Telescope, EELT) номини олди. Қурилма Чилининг Атакама чўлида 2024 йилгача барпо этилади.
Қиймати 1 миллиард еврони ташкил этувчи қурилма бешта сегментли ойна билан жиҳозланади. Улардан энг йиригининг диаметри 39 метрни ташкил этади, у 800 га яқин диаметри 1,4 метрлик олтибурчакли ойнадан ташкил топади.
Конструкциянинг умумий оғирлиги беш минг тонна бўлиб, ундан уч минг тоннаси қурилманинг ҳаракатланадиган қисмига тўғри келади.
Манба: daryo.uz
