Ошқовоқнинг фойдали жиҳатлари
Ошқовоқ қадим замонлардан бери тиббиётда кенг қўлланиб келади. Бу маҳсулот каротин моддаси ҳамда С витаминига бой бўлиб, соч ва терини тиниқлаштиришда муҳим аҳамиятга эга. Каротин моддасидан ҳосил бўладиган А витамини тери ёғлари ишлаб чиқарилишини яхшилайди. Агар бу витамин етишмаса юзга хуснбузар тошиш эҳтимоли ортади. Бундан ташқари, ошқовоқнинг уруғи ҳам жуда фойдали: унинг таркибидаги аминокислота, темир микроэлементлари қон айланишига, томир ва мия фаолиятига ижобий таъсир кўрсатади. Ошқовоқ уруғи таркибидаги оқсил қондаги шакар миқдорини нормал ҳолатга келтиради.
Бошқа сариқ рангли сабзавот ва мевалар каби ошқовоқ таркибида ҳам каротиноид ва антиоксидант моддалари жуда кўп. Бу моддалар оксидлаш жараёнига тўсқинлик қилиб, мия қаришини секинлаштиради. Шунингдек, у калорияси кам маҳсулот бўлгани учун озишга ёрдам беради.
Миржалол Мадвалиев
тайёрлади.
