Лойиҳа якунланди

Оила Ватан ичра Ватандир. Унинг мустаҳкамлиги эртанги кунимизга бўлган ишонч ва масъулият ҳиссини оширади. Юртимизда оиланинг жамиятда тутган ўрни ва ролини мустаҳкамлаш, фарзандларимизни соғлом ва баркамол этиб вояга етказиш масалаларига алоҳида эътибор қаратилмоқда.

Пойтахтимиздаги “Shodlik Palace” меҳмонхонаси анжуманлар залида Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди томонидан Журналистларни қайта тайёрлаш халқаро маркази ва БМТнинг Болалар жамғармаси – ЮНИСЕФ билан ҳамкорликда “Оила институтини мустаҳкамлаш масалаларини илгари суришда Ўзбекистон ОАВ салоҳиятини ошириш” лойиҳаси сарҳисобига бағишланган давра суҳбати ўтказилди.

Тадбирда сўзга чиққанлар журналистларнинг оналик ва болаликни муҳофаза қилиш соҳасидаги давлат дастурлари, “Бола ҳуқуқлари тўғрисидаги” Конвенция ва болалар ҳуқуқларига доир миллий қонунчилик меъёрлари ижроси юзасидан кенг жамоатчиликни доимий хабардор қилиш кўникмаларини ошириш лойиҳанинг асосий мақсади эканини таъкидладилар.