Бир йилда уч марта ҳосил

Самарқанд вилояти аҳолисининг етмиш фоизи қишлоқларда истиқомат қилиши ва уларнинг тасарруфида бир неча минг гектар ер мавжудлигини ҳисобга олсак, вилоят озиқ-овқат етиштиришда нақадар катта ресурсга эга эканлиги аён бўлади.

– Томорқадан оқилона фойдаланилса, бир йилда бемалол уч марта ҳосил олиш мумкин, – дейди Пастдарғом тумани “Қўқони” маҳалласида яшовчи Комил Қувондиқов. – Тасарруфимизда 15 сотих ер участкаси бор. 8 сотихи хўжалик бинолари, мевали дарахт, ток билан банд бўлганида ҳам 7 сотих деҳқончиликка қолади. Тажрибамдан маълум, агар ер оби-тобида ишлов берилиб, маҳаллий ўғитга тўйдирилса, бир сотих ердан ўртача 300 килограмм картошка, 350 килограмм помидор, 250-300 килограмм сабзи олиш мумкин. Эртанги ҳосил йиғиштириб олиниши билан иккинчи экин сифатида бодринг, маккажўхори экса бўлади. Улардан бўшаган ерга учинчи марта кузги сабзи, турп, шолғом экиб, бир тоннадан зиёд ҳосил олиш имконияти мавжуд. Айниқса, кечки карам ҳосилдор бўлади. Бир сотихдан 650-700 килограмм ҳосил кўтариш, кеч кузда яна ерга тўқсонбости қилиб, пиёз, саримсоқпиёз, шивит, петрушка ва исмалоқ экиш мумкин. Хуллас, бир парча томорқа ердан унумли фойдаланилса, бир йилда ҳатто, тўрт марта экин экса бўлади.

Бунақа қуёшли юрт яна қайда бор? Тер тўкиб, меҳнат қилган кишини ер қуруқ қўймайди. Эндиликда томорқадан фалончи 30-40 миллион сўм даромад олибди, деса ҳеч ким ажабланмай қўйди. Сабаби, кимдир лимон, кимдир иссиқхонада, очиқ майдонда сабзавот етиштириб, буни исботлаяпти. Шу боис, бозорларимиз йил – ўн икки ой ноз-неъматлар билан тўла.