Телевизор – болаларнинг ортиқча семириб кетишига сабаблардан бири
Лондон Университет коллежи олимлари 12556 нафар боланинг тиббий маълумотларини таҳлил этди. Олимлар аниқлашича, 7 ёшида ётоқхонасида телевизори бўлган болаларнинг 30 фоизига 11 ёшида семириш ташхиси қўйилган. Ётоқхонада телевизор ўрнатиш семириш хавфини тахминан 20 фоизга оширган.
Тадқиқотчилар натижаларга таъсир кўрсатиши мумкин бўлган омилларга, хусусан, оиланинг даромад даражаси, она сутидан озиқлантириш давомийлиги, онанинг маълумот даражаси, уйқу ҳолати, жисмоний фаоллик даражаси, онанинг ҳамда боланинг 3 яшарлигидаги тана оғирлиги индекси кабиларга ҳам эътибор қаратишди. Телевизор олдида вақт ўтказиш асосан қизларда ортиқча вазн пайдо бўлишига олиб келган.
Бундан ташқари, бошқа тадқиқотлар телевизор ва комьютерлар болаларда диабетга учраш хавфини кўпайтиришини кўрсатди. Диабетга экран олдида уч соатдан ортиқ вақт ўтказадиган болалар кўпроқ мойил бўлади.
Кузатувлар уларнинг қонида ёғ миқдори ортиб, қондаги қанд моддаси кўпайганини, инсулинга чидамлилик даражаси ва қон босими баландлаганини кўрсатди.
Орифжон Мадвалиев
тайёрлади.
