“АҚЛЛИ СОАТЛАР”
“Samsung” компанияси смартфонлар бажарадиган функцияларни такрорлай оладиган қўл соатлари устида иш олиб бормоқда. Қурилма ҳақида “Samsung”нинг мобиль қурилмалар бўлинмаси вице-президенти Ли Ён Хи (Lee Young Hee) Bloomberg ахборот агентлигига берган интервьюсида маълум қилди:
“Биз келажак маҳсулотлари устида иш олиб бормоқдамиз. Соатлар, маълум маънода, ушбу маҳсулотлардан бири ҳисобланади”, – деди Ли Ён Хи хоним.
“Samsung”нинг “ақлли соатлари” тўғрисидаги илк хабарлар 2013 йилнинг февралида пайдо бўлган эди. Ўшанда соатлар Android операцион тизимида ишлаши ва Galaxy Altius номини олиши хабар қилинган эди.
Худди шу ойда норасмий манбалар Apple компанияси ҳам смартфон ўрнини боса оладиган қўл соатлари устида ишлашни бошлаганини маълум қилишган эди. Шартли номи iWatch деб аталаётган қурилма фойдаланувчига қўнғироқларни амалга ошириш, хариталарни кўриш имконини беради, шунингдек, ундан қадам ўлчагич ва пульс ўлчагич сифатида ҳам фойдаланса бўлади.
Интернет материаллари асосида тайёрланди.
