Қўлингиз дард кўрмасин
Узоқ йиллар мобайнида нафас олишга қийналар эдим. Бурун пардаси қийшиқлиги сабабли ҳидларни сезишим ҳам бузилган эди. Қийналиб нафас олганлигим сабабли юрак қон томир тизимида ҳам зўриқиш бор эди. Қон босимим ошиб турар ва иштаҳам пасайиб кетганди. Бунинг натижасида бошимда кучли оғриқ ҳис этардим.
Жорий йилнинг 18 ноябрь куни пойтахтдаги 5-сонли шаҳар клиник шифохонасининг жарроҳлик бўлимида бурун пардасининг қийшиқлиги нуқсони жарроҳлик йўли билан бартараф этилди. Ушбу муаммолардан мени халос этган кўп йиллик тажрибага эга моҳир лор – жарроҳ Владимир Мирзаян, анестезиолог Зоя Карпова, операция хонаси ҳамшираси Соня Султонова, ҳамшира Феруза Бойтурсунова, катта ҳамшира Елена Шевцоваларга ўз миннатдорлигимни билдираман. Шунингдек, бош шифокор Гулнора Кенжаева ана шундай аҳил ва ўз касбига садоқатли тиббиёт ходимларининг ишини моҳирлик билан бошқараётганлиги учун алоҳида ташаккур билдираман.
Сўзим сўнггида қўлларингиз асло дард кўрмасин, азиз шифокорлар дейман.
Дилдора МИРЗАЕВА,
Тошкент шаҳри, Миробод тумани
