Таълим тизимида: юксак сифат ва самарадорлик
Юртимизда маънан ва жисмонан баркамол авлодни вояга етказиш борасида олиб борилаётган кенг кўламли ислоҳотлар бугун давлат сиёсати даражасига кўтарилган.
Маълумки, бошланғич таълим умумий ўрта таълимнинг асосий пойдевори бўлиб, ўқувчиларнинг келгусидаги муваффақияти, уларнинг ҳар томонлама камол топиши кўп жиҳатдан бошланғич таълимининг сифатига боғлиқ. Айни вақтда республикамиздаги умумтаълим мактабларида бир юз ўн минг нафардан зиёд бошланғич таълим ўқитувчилари фаолият кўрсатмоқда. 2013-2014 ўқув йилида 1-4 синфлар учун жами 164 номда ўн миллион нусхадан ортиқ дарсликлар чоп этилди. Ўзбекистон Республикаси Халқ таълими вазирлиги ҳузуридаги Мультимедиа умумтаълим дастурларини ривожлантириш марказида “Умумий ўрта таълимда бошланғич таълимнинг методик таъминоти: муаммолар ва келгусидаги вазифалар” мавзуида ўтказилган видеоконференцияда ҳам бошланғич синфларда ўқитиш тизимини янада такомиллаштириш вазифаларига тўхталиб ўтилди.
Ушбу видеоконференцияда Қорақалпоғистон Республикаси Халқ таълими вазирлиги, Тошкент шаҳар ва вилоятлар Халқ таълими бошқармалари ва малака ошириш институтлари, туман (шаҳар) халқ таълими муассасалари фаолиятини методик таъминлаш ва ташкил этиш бўлимлари бошлиқлари, туманлардаги бошланғич таълим бўйича фан уюшмаси раислари, таянч мактаб директорлари ва ўқитувчилари, тажрибали, илғор ва ижодкор ўқитувчилар иштирок этди. “Замонавий муаллим қиёфаси”, “Бошланғич синфларда инновацион технологиялардан фойдаланиш”, “Бошланғич таълим ўқитувчилари малакасини ошириш – муаммо ва уларнинг ечими” каби мавзулар юзасидан маърузалар тингланди.
Йиғилишда Ўзбекистон Республикаси Халқ таълими вазири У.Иноятов сўзга чиқиб бошланғич таълим ўқитувчилари малакасини ошириш ва уларни методик ҳамда ўқув адабиётлари билан таъминлашни такомиллаштириш ҳақида тўхталиб ўтди. Шунингдек, илғор тажрибали, ижодкор ўқитувчиларнинг олиб бораётган ишлари юзасидан ўзаро тажриба алмашилди.
