Оила-маҳалла-таълим муассасаси: муваффақиятли ҳамкорлик

Пойтахтимиздаги Алишер Навоий номидаги Ўзбекистон Миллий боғида "Қадр-қимматим, таянчим ва ифтихоримсан, мустақил Ўзбекистон!" шиори остида маданий-маърифий тадбир бўлиб ўтди. Ўзбекистон Республикаси Маданият ва спорт ишлари вазирлиги, Тошкент шаҳар ҳокимлиги, "Ўзбекнаво" эстрада бирлашмаси, Ёзувчилар уюшмаси, "Ўзбектеатр" ижодий ишлаб чиқариш бирлашмаси ва қатор тегишли ташкилотлар ҳамкорлигида ўтказилган мазкур тадбирда педагоглар, таълим тизими фидойилари ва талаба-ёшлар иштирок этди.

Ҳаётимизга изчил татбиқ этилаётган "Таълим тўғрисида"ги қонун, Кадрлар тайёрлаш Миллий дастури жамият ҳаётининг барча соҳалари учун юқори касб малакасига эга мутахассисларни етказиб бериш, билим беришнинг сифати ва мазмунини тубдан яхшилаш, таълим даргоҳларининг моддий-техник базасини мустаҳкамлаш, ўқитувчиларнинг меҳнатини эъзозлаш ва рағбатлантиришда муҳим аҳамият касб этмоқда.

Ушбу жиҳатлар Тошкент шаҳридаги таълим масканлари фаолиятида ҳам ўз ифодасини топмоқда. Ўтган ўқув йилида пойтахтимиздаги умумтаълим мактаблари 9-синфини 38 минг 317 нафар ўқувчи тамомлади. Қизиқиши, лаёқати ва қобилиятини эътиборга олган ҳолда улар таълимнинг кейин­ги босқичига тўлиқ қамраб олинди. Жорий ўқув йилида ўрта махсус, касб-ҳунар таълими масканларини 26 минг нафардан ортиқ ёшлар битирди.