Хитойлик тадбиркор “боинг”дан ресторан яратди
Яқинда хитойлик тадбиркор Ли Яну Ухань шаҳрида ҳақиқий авиақурилмада ноодатий ресторан яратди. У ўзининг ресторани – “Боинг – 737”ни 2013 йилда касодга учраган авиакомпаниядан 5 миллион АҚШ долларига сотиб олган эди. Ресторанга тадбиркор турмуш ўртоғининг номи берилди.
Кафенинг самолётга ўхшаши Ли Януни қониқтирмади. У бу ерда учаётган самолётдаги каби муҳитни яратиш, энг яхши авиакомпаниялардаги каби хизмат кўрсатиш меъёрларини ўрнатишни хоҳлади. Ишга қабул қилиш учун хизмат кўрсатувчи ходимларга “самолёт”даги каби талаблар мавжуд. Ҳар бир ходим бортда хизмат кўрсатиш бўйича тегишли йўриқлардан ўтади.
Ресторанга кириш ҳам самолётга чиқишни эслатади, яъни трап орқали юқорига кўтарилади. Кафе бир вақтнинг ўзида 70 нафар меҳмонни қабул қилиши мумкин. Овқатнинг нархи 25 дан 40 АҚШ долларига боради. Тадбиркор бундан кейин турли халқларнинг ошхонасига тегишли ошпазларни жалб қилиб, ўз мижозлари сонини кўпайтиришга қарор қилган.
