Тўғри танланган касб

муваффақиятлар дебочасидир

Ўзбек халқи болажон халқ. Қадимдан юртимизда фарзанд тарбиясига, унинг келажагига катта эътибор қаратилган. Бу анъана кишиларнинг қон-қонига сингиб кетган. Аммо баъзи ота-оналар болаларининг замон билан ҳамнафас бўлишини истаб, уларни эркин қўйишади. Натижада фарзандлари “оммавий маданият” домига тушиб қолишаётганини сезмай қолишади. Баъзилар эса фарзандининг таълим-тарбиясига бефарқ қарашади. Зеро, бугунги ёш авлод юртимизнинг келажагини таъминлашини унутмаслик лозим.

Шу мақсадда замон талабларига мос билим масканлари қад ростламоқда. Ёшларимиз энг илғор технологиялар асосида илм олишмоқда. Шу ўринда айтиш жоизки, ота-боболаримиздан ўтиб келаётган гўзал анъаналар, ўлмас қадриятларни болалар онгига сингдириш давр талаби. Бу эзгу омилнинг илдизи эса оиладаги муҳит билан бевосита боғлиқдир. Зеро, ҳар қандай эзгуликнинг заминида гўзал одоб мужассам.

Жамият тарққиётини таъминлашга фақат баркамол авлодгина қодирдир. Комилликнинг тамал тоши эса оилада қўйилади. Ота-она феъл-атворида учрайдиган ижобий ва салбий хусусиятлар уларнинг зурриётларида ҳам кузатилади. Ҳар бир касб-ҳунар соҳибининг дунёқараши, маънавий савияси болаларининг руҳиятида ўз ифодасини топади.

Жумладан, зиёли хонадонда вақт оила аъзолари учун қадрли неъмат саналади. Улардаги самимийлик, камтарона мулозамат, тартиб ва орасталик кишининг ҳавасини келтиради. Яшаш тарзида ортиқча ҳашамга ўрин берилмайди.

Ҳунармандлар оиласида эса шахсий ибрат асосидаги меҳнат бола тарбиясига таъсир ўтказганининг гувоҳига айланасиз. Ҳунаридан мамнун ва эл орасида обрў-эътибор топаётган бундай кишилар фарзандларининг аксарияти хос ота касбини танлайди. Улардаги ирсий лаёқат сирларини ўзлаштиришларида қўшимча маҳорат захирасини ўтайди.

Тадбиркорлар – ҳаётий тажриба, билим ва идрокини амалда қўллай оладиган ташаббускор кишилардир. Бу тоифадаги инсонлар замон билан ҳамнафас яшаётган шижоатли амалиётчилардир. Уларнинг фарзандлари мақсад сари интилувчан, ғайратли, аксарияти бирор ишни йўлга қўйишда билимнинг юқори асос бўлишини англаб етган ёшлардир.

Боладаги туғма лаёқат омилларини ўз вақтида кўра олиш, уни ривожлантириш учун сабр билан ҳаёт тажрибалари, билим-тафаккур асосида ёндашиш ҳар бир ота-онанинг эзгу вазифаси, бурчидир. Лаёқациз ва ҳаётга тўғри йўналтирилмаган йигит-қизларнинг аксарияти касб-ҳунар танлашда хатога йўл қўйишади. Касб-ҳунарни фақат моддий манфаатни кўзлаган ҳолда танлаш яхши самара бермаслиги мумкин. Ўз имконияти, лаёқатига мос танланган касб кишига қувонч, ҳаётига мазмун, фикр-идрокининг ривожига туртки беради.