ҚАЛБИ қуёш билан СИРДОШ

Қўллари меҳнатдан қаварган, юзига ҳаёт қувончу-дардлар харитасини чизган момомга боқиб, йилларнинг яхши-ёмон соясини кўраман. Урушнинг совуқ ҳиди келиб турганда, балоғатга етмасдан катталар билан елкама-елка меҳнат қилиб ўрганган ўша пайтдаги ёшгина қиз бугунги кунда тўқсон олти ёшни қаршилаган.

_Аслида хонадонимиздаги тўкин-сочинлик, қут-бараканинг мўллигига сабаб шу момомнинг дуолари эмасмикан, деб ўйлаб қоламан.

Баъзан тадбиркорлигимиз-у, тажрибамизни, топарман-тутарманлигимизни рўкач қилиб, олган машина-ю, замонавий уйларимизни кўрсатамиз.

Бугунги кунимиз момомнинг уруш ва очарчилик вақтида кеча-ю кундуз бир бурда қора нонни сўраб қилган илтижолари олдида тўкин бир бозорни эслатади.

Айтишларича, йилларнинг залворли юки ҳам момомнинг иродасини бука олмабди.

Йиллар ўца-да ўзгармаган ушбу иродани ўзимизда жамулжам этишга кучимиз етмай қолади.

Бировнинг айбини юзига айтиш, орқасидан иғво қилмаслик, ёлғон гапирмаслик, озодалик, тартибли овқатланиш ҳозирги кунда невара ва эвараларга ҳам ўргатиб келинаётган қоидалардир. Невара ва эвараларга ёд бўлиб кетган момомнинг иборалари кундалик турмушда ишлатиб турилади:

Текин ишласанг ишла, оч ишлама;

Душманга хор-зор этма;

Ана шундай қалби қуёш билан сирдош момом бугун юз билан юзлашай деб туришига қарамасдан, кўзойнаксиз невара ва эвараларининг тўйларига атаб кўрпача ва кўрпалар тикиш билан банд. Шундай хазиналаримизни кўз қорачиғимиздай асраб, ёш авлодни мукаммал тарбиялаб, соғлом вояга етказишда улардан андоза олайлик.