Куч – билим ва тафаккурда

Юртимизда эртамизнинг муносиб ворислари бўлган ёшларимизга яратилаётган шароитларга чинданда ҳавасинг келади. Ана шу имкониятлардан самарали фойдаланаётган йигит-қизларнинг янги-янги марраларни забт этаётгани ҳеч кимга сир эмас. Айниқса, республика миқёсида ўтказилаётган кўрик-танловлар, фан олимпиадалари, турли беллашувлар чинакам иқтидор эгаларини кашф этишда қўл келмоқда.

Ҳукуматга қарашли бўлмаган "Соғлом авлод учун" халқаро ҳайрия жамғармасига қарашли Тиббий-ижтимоий марказда бўлиб ўтган тадбир жамғарманинг ташкил топганига 20 йил тўлиши муносабати ҳамда "Соғлом авлод" газетаси ҳамкорлигида ёшлар ўртасида ўтказилган "Фарзандлари соғлом юрт – қудратли бўлур" танлови якунларига бағишланди. Мазкур танлов саволларига тўғри жавоб йўллаган 2-Тошкент Юридик коллежи 2-бос­қич ўқувчиси Ҳуррият Донобоева ўз сўзида, "Биз ёшларга яратилаётган кенг имкониятлардан унумли фойдаланамиз. Ўқиб-изланамиз. Чунки, юртимиз эртаси иқтидорли ёшлар қўлида", – дея таъкидлади. Шунингдек, танлов ғолиблари Ўзбекистон Давлат Жисмоний тарбия институти 2-босқич талабаси Нодирбек Ёқубов, Тошкент шаҳар Шайхонтоҳур туманидаги 34-мактаб ўқувчиси Эъзоза Усмонхўжаевалар ҳам ўз сўзларида ёшларга яратилаётган имкониятлар, шароитлар ва уларга кўрсатилаётган эътибор ҳақида тўхталиб ўтишди.